Enghreifftiau o sefyllfaoedd penodol

Gwasanaethau cyflogaeth

Rhaid i ddarparwr gwasanaeth cyflogaeth beidio â gwahaniaethu’n anghyfreithlon yn erbyn pobl sy’n defnyddio ei wasanaethau neu sydd am eu defnyddio.

Yn ogystal, mae gan ddarparwr gwasanaeth cyflogaeth ddyletswydd i wneud addasiadau rhesymol, ac eithrio wrth ddarparu gwasanaeth galwedigaethol.

Ar gyfer darparwyr gwasanaethau cyflogaeth, yn wahanol i gyflogwyr, mae'r ddyletswydd yn 'rhagweladwy'. Os ydych yn ddarparwr gwasanaeth cyflogaeth, mae hyn yn golygu na allwch aros nes bod person anabl eisiau defnyddio’ch gwasanaethau, ond mae’n rhaid ichi feddwl ymlaen llaw (ac yn barhaus) am yr hyn y gallai fod ei angen yn rhesymol ar bobl anabl ag amrywiaeth o namau, megis pobl sydd â nam ar eu golwg, nam ar y clyw, nam symudedd, neu anabledd dysgu. Er enghraifft: mae asiantaeth gyflogaeth yn sicrhau bod ei gwefan yn hygyrch i bobl anabl a'i bod yn gallu darparu gwybodaeth am gyfleoedd gwaith mewn amrywiaeth o fformatau amgen. Mae hefyd yn sicrhau bod ei staff wedi'u hyfforddi i gynorthwyo pobl anabl sy'n dod ato i gael gwybodaeth am gyfleoedd gwaith.

Pensiynau galwedigaethol

Rhaid i gynlluniau pensiwn galwedigaethol beidio â gwahaniaethu'n anghyfreithlon yn erbyn pobl.

Yn ogystal, rhaid i gynllun pensiwn galwedigaethol wneud addasiadau rhesymol i unrhyw ddarpariaeth, maen prawf neu arfer mewn perthynas â’r cynllun sy’n rhoi person anabl o dan anfantais sylweddol o gymharu â phobl nad ydynt yn anabl.