Darganfod a yw rhywun yn berson anabl

Beth sy'n rhesymol?

Mae'n rhaid i chi wneud y newidiadau hyn dim ond pan fyddwch yn gwybod neu y gellid disgwyl yn rhesymol i chi wybod bod gweithiwr yn berson anabl a'i fod - neu'n debygol o fod - o dan anfantais sylweddol o ganlyniad. Mae hyn yn golygu gwneud popeth y gellir yn rhesymol ddisgwyl i chi ei wneud i ddarganfod y ffeithiau.

Nid yw hyn, fodd bynnag, yn golygu gofyn cwestiynau ymwthiol neu rai sy'n torri urddas rhywun. Meddyliwch am breifatrwydd a chyfrinachedd yn yr hyn rydych chi'n ei ofyn a sut rydych chi'n gofyn.

Cyngor arfer da: byddwch yn barod ar gyfer gwneud addasiadau rhesymol

Mae cyfraith cydraddoldeb yn dweud bod yn rhaid i chi wneud addasiadau rhesymol os ydych yn gwybod bod gweithiwr yn berson anabl, bod angen addasiadau arno a bod yr addasiadau hynny’n rhesymol.

Nid oes rhaid i chi roi addasiadau rhesymol ar waith rhag ofn i un o'ch gweithwyr presennol ddod yn berson anabl.

Ond efallai y byddwch am fod yn barod drwy wneud y canlynol:

• Meddyliwch ymlaen llaw am dasgau craidd swydd benodol a pha addasiadau allai fod yn bosibl (cyn dechrau ymarfer recriwtio neu ddyrchafiad, er enghraifft).
• Rhowch proses ar waith ar gyfer gweithio allan addasiadau rhesymol os bydd gweithiwr presennol yn dod yn anabl neu berson anabl yn dechrau gweithio gyda’r sefydliad, cyn wynebu sefyllfa unigol.
• Gwnewch yn siŵr eich bod yn gwybod ymlaen llaw pa gymorth sydd ar gael i bobl anabl gan Fynediad i Waith.
• Os ydych yn gwneud gwaith adnewyddu neu addasiadau i'ch adeilad, bydd meddwl am sut y gallwch wneud y rhannau newydd o'ch adeilad yn fwy hygyrch i bobl anabl yn eich helpu os byddwch yn cyflogi person anabl yn ddiweddarach ac yn eich galluogi i ddenu mwy o ddarpar weithwyr.

Yn ogystal ag osgoi hawliad Tribiwnlys Cyflogaeth posibl, mae bod yn agored i wneud addasiadau rhesymol yn golygu efallai y byddwch yn gallu osgoi colli sgiliau gweithiwr sydd wedi dod yn berson anabl dim ond trwy wneud ychydig o newidiadau.