Confensiwn ar Ddileu Gwahaniaethu yn erbyn Menywod (CEDAW)

Mae CEDAW yn gytundeb hawliau dynol rhyngwladol a fabwysiadwyd ym 1979. Cytunodd y DU i’w ddilyn ym 1986.

Drwy ddilyn CEDAW, mae’r DU yn cytuno i gymryd camau i sicrhau bod menywod yn mwynhau hawliau dynol yn llawn ar sail gyfartal â dynion, gan gynnwys:

• dileu rolau ystrydebol ar gyfer menywod a dynion
• sicrhau cyfranogiad cyfartal menywod mewn bywyd cyhoeddus
• cydraddoldeb o flaen y gyfraith
• dileu gwahaniaethu mewn cyflogaeth

Archwiliodd y Cenhedloedd Unedig ddiwethaf pa mor dda y mae’r DU yn gweithredu CEDAW ym mis Chwefror 2019 a chyhoeddodd ei argymhellion ym mis Mawrth 2019. Roedd y rhain yn cynnwys:

• ymgorffori CEDAW mewn cyfraith ddomestig a chreu mecanwaith cenedlaethol i oruchwylio ei weithrediad
• sicrhau bod hawliau menywod yn cael eu hamddiffyn yn ystod y broses o adael yr Undeb Ewropeaidd
• cadarnhau Confensiwn Istanbul, a chymryd pob cam angenrheidiol i amddiffyn menywod a merched rhag trais ar sail rhywedd
• asesu effaith gwariant cyhoeddus, diwygiadau treth a lles ar hawliau menywod, a chymryd camau i leihau a datrys unrhyw effeithiau negyddol
• cymryd camau i roi terfyn ar stereoteipiau rhywedd negyddol a hyrwyddo cynrychioliadau cadarnhaol ac amrywiol o rywedd mewn ysgolion, ymgyrchoedd cyhoeddus a’r cyfryngau
• ei gwneud yn ofynnol i bob cyflogwr amddiffyn menywod rhag aflonyddu rhywiol yn y gweithle

Mae’r gwaith diweddaraf yr ydym wedi’i gynhyrchu fel rhan o’n gwaith monitro CEDAW yn cynnwys:

• ein hadolygiad mwyaf erioed o hawliau menywod - Pwyso am gynnydd: hawliau menywod a chydraddoldeb rhywiol (Gorffennaf 2018)
• adroddiad wedi’i ddiweddaru, yn cyflwyno tystiolaeth bellach i bwyllgor CEDAW (Chwefror 2019)
• llythyr at lywodraeth y DU yn gofyn iddynt nodi sut y byddant yn gweithredu argymhellion y Cenhedloedd Unedig. Gallwch lawrlwytho copi o'u hymateb atom (Word)