Mae’r Comisiwn Cydraddoldeb a Hawliau Dynol (EHRC) wedi cyhoeddi penodiad dau aelod newydd i’w Bwyllgor Cymru.
Mae’r Pwyllgor yn rhoi cyngor diduedd i’r Comisiwn, ei Fwrdd a Llywodraeth Cymru, ar amrywiaeth o faterion cydraddoldeb a hawliau dynol cymhleth sy’n ymwneud â Chymru, gan sicrhau bod y Comisiwn yn cyflawni ei swyddogaethau mewn perthynas â materion a gadwyd yn ôl a materion datganoledig.
Dau aelod newydd y pwyllgor yw:
- John Williams
- Lauren McEvatt
Dywedodd Cadeirydd Dros Dro Pwyllgor Cymru y Comisiwn, Martyn Jones YH DR:
“Rydym yn falch iawn o groesawu ein dau aelod pwyllgor newydd yn dilyn eu penodiad yr wythnos diwethaf.
“Maen nhw’n dod â chyfoeth o wybodaeth ac arbenigedd gyda nhw, a fydd yn cryfhau Pwyllgor Cymru ymhellach fel cynghorydd arbenigol a diduedd ar anghenion a blaenoriaethau pobl ledled Cymru.
“Ddiwedd 2023, cyhoeddodd y Comisiwn Cydraddoldeb a Hawliau Dynol ei adroddiad diweddaraf 'A yw Cymru'n Decach?', archwiliad cynhwysfawr o'r dirwedd cydraddoldeb a hawliau dynol yng Nghymru. Ynghyd â staff EHRC Cymru, bydd y Pwyllgor yn parhau i weithio gyda’n rhanddeiliaid ledled y wlad i wneud Cymru’n lle tecach, drwy fynd i’r afael â’r heriau penodol a nodwyd yn yr adroddiad.”
Nodiadau i olygyddion
- Mae bywgraffiadau'r ddau aelod pwyllgor newydd i'w gweld isod. Byddant yn y swydd am rhwng dwy a phum mlynedd. Maent yn ymuno ag aelodau presennol y pwyllgor Martyn Jones, Beth Thomas, Chris Dunn, Helen Mary Jones a Mary van den Heuvel.
- Mae cylch gorchwyl Pwyllgor Cymru yn nodi ei rolau a swyddogaeth fel un o bwyllgorau statudol y Comisiwn. Penodir aelodau Pwyllgor Cymru gan fwrdd y EHRC.
- Darllenwch 'Monitor Cydraddoldeb a Hawliau Dynol 2023: A yw Cymru'n Decach? '.
Bywgraffiadau
- Mae John Williams yn Athro Emeritws y Gyfraith yn Adran y Gyfraith a Throseddeg Prifysgol Aberystwyth. Mae John hefyd yn Gadeirydd Bwrdd Ymddiriedolwyr Age Cymru, ac yn aelod o ymchwiliad Comisiynydd Pobl Hŷn Gogledd Iwerddon i Gartref Gofal Dunmurry. Ar hyn o bryd mae'n ymchwilio i bynciau pobl hŷn a'r gyfraith, gan gyfeirio at hawliau dynol.
- Mae Lauren McEvatt yn gyn-aelod o’r Comisiwn Annibynnol ar Ddyfodol Cyfansoddiadol Cymru, a lansiodd ei adroddiad terfynol ar 18 Ionawr 2024. Mae Lauren yn gyn Gynghorydd Arbennig Ceidwadol Llywodraeth y DU i Swyddfa Cymru o Weinyddiaeth y Glymblaid. Mae Lauren wedi gweithio i sawl llywodraeth ar draws Dwyrain Affrica a'r Caribî, gan gynnwys llywodraeth Tiriogaeth Dramor Brydeinig. Ar hyn o bryd mae Lauren yn gweithio ym materion llywodraeth ryngwladol gan gwmpasu ymgysylltiad y sector cyhoeddus a phreifat â sefydliadau amlochrog a sefydliadau datblygu.
