Ar 20 Medi ymunodd Marcial Boo fel ein Prif Weithredwr newydd. Yma mae'n rhannu ei farn ar gylch gwaith y Comisiwn a'i flaenoriaethau ar gyfer y dyfodol.
Mae'n anrhydedd i mi arwain y Comisiwn Cydraddoldeb a Hawliau Dynol ac rwy'n gyffrous i ymuno wrth i ni ymgynghori â chi am ein gweithgaredd arfaethedig ar gyfer y tair blynedd nesaf.
Mae gwaith y Comisiwn dros y flwyddyn ddiwethaf wedi dangos sut yr ydym yn cynnal cyfraith cydraddoldeb a hawliau dynol heb ofn na ffafr. O’n hymchwiliad i honiadau o wrthsemitiaeth yn y Blaid Lafur i’n hasesiad o gydymffurfiaeth y Swyddfa Gartref â Chyfraith Cydraddoldeb mewn perthynas â sgandal Windrush i herio hiliaeth ysgytwol yn Pontins, mae ein gwaith nid yn unig wedi cyrraedd y penawdau ond hefyd wedi cael effaith wirioneddol ar newid ymddygiad ac ymarfer.
Mae’n fraint i ni ym Mhrydain gael cyfreithiau cydraddoldeb a hawliau dynol cryf. Maent yn ganlyniad degawdau, os nad canrifoedd, o frwydro. Nid oes gan bobl mewn gormod o wledydd eraill ein hamddiffyniadau. Ond dim ond os cânt eu cynnal a'u gorfodi y mae cyfreithiau'n gryf.
Mae gan y Comisiwn rôl unigryw fel rheoleiddiwr cydraddoldeb a hawliau dynol Prydain.
Gwn nad yw rhai pobl yn hoffi rheoleiddwyr - pwy sy'n hoffi cael gwybod beth i'w wneud? Ond mae rheoleiddwyr yn chwarae rhan hanfodol wrth wneud i gymunedau weithio'n deg, gyda phawb yn chwarae yn ôl rheolau cytûn.
Mae ein rheolau yn cael eu gosod gan y senedd. Mae'r rheolau'n esblygu dros amser mewn ymateb i ymgyrchoedd a newidiadau mewn cymdeithas. Ein rôl fel canolwr diduedd yw gwneud yn siŵr bod pawb, pwy bynnag ydyn nhw - boed yn sefydliadau neu'n unigolion - yn deall y rheolau ac yn glynu atynt. Ac rydym yn gynghorydd i osodwyr rheolau yn y llywodraeth neu'r senedd hefyd, fel eu bod yn elwa ar wybodaeth arbenigol sefydliad annibynnol a sefydlwyd i hyrwyddo cydraddoldeb a hawliau dynol. Disgwyliaf inni chwarae’r rôl honno â chryfder ac awdurdod.
Rwyf wedi treulio fy ngyrfa mewn swyddi sector cyhoeddus a gwirfoddol – yn dysgu oedolion i ddarllen mewn dosbarthiadau nos, yn arwain gwaith y llywodraeth ar wrthderfysgaeth, yn gweithio ym maes iechyd cyhoeddus drwy Covid, ac yn rheoleiddio ASau ar ôl y sgandal treuliau. Yn yr holl rolau hyn, rwyf wedi bod yn gwbl ymroddedig i adeiladu cymdeithas decach, fwy cyfartal i bob un ohonom.
Mae gennych chi rôl hanfodol i'w chwarae hefyd, p'un a ydych mewn elusen, yn y llywodraeth neu yn y byd academaidd. Edrychaf ymlaen at weithio gyda chi i gyd fel y gallwn gyda’n gilydd sicrhau cydymffurfiaeth â’n cyfreithiau cydraddoldeb a hawliau dynol cryf, presennol, a gweithio i’w gwella hyd yn oed yn fwy.
