Diogelu staff Sainsbury's rhag aflonyddu rhywiol

Rydym wedi ymrwymo i sicrhau bod cyflogwyr yn cael eu dwyn i gyfrif am wahaniaethu, aflonyddu ac erledigaeth fel bod pob gweithiwr yn cael ei drin yn deg.

Mae hyn yn parhau i fod yn flaenoriaeth i ni yn ein Cynllun Strategol 2022 i 2025.

Buom yn gweithio’n agos gyda Sainsbury’s i wneud cytundeb cyfreithiol, a elwir yn gytundeb adran 23 o dan Ddeddf Cydraddoldeb 2006.

Roedd y cytundeb yn ei gwneud yn ofynnol i Sainsbury’s gymryd pob cam rhesymol i atal ei weithwyr rhag aflonyddu ac roedd yn cynnwys:

• paratoi canllaw gwahaniaethu ar gyfer rheolwyr llinell a chyflogeion
• cynghori staff ar sut i ddelio ag aflonyddu trwy gyfathrebu mewnol
• sefydlu hyfforddiant mwy effeithiol ar gyfer ei weithlu
• darparu adroddiadau rheolaidd i ni ar ei gynnydd.

Darparodd Sainsbury's ddiweddariadau i'r Comisiwn bob chwe mis ar statws presennol yr holl bwyntiau gweithredu a gynhwysir yn y cytundeb.

Gwnaethom fonitro cydymffurfiad Sainsbury's â'r cynllun gweithredu i sicrhau bod y camau y cytunwyd arnynt yn cael eu cwblhau.

O ganlyniad i’r cytundeb:

• mynychodd dros 151,000 o gydweithwyr hyfforddiant Amrywiaeth a Chynhwysiant
• Mynychodd 16,200 o reolwyr hyfforddiant gloywi ar amrywiaeth o feysydd yn ymwneud â chydraddoldeb ac amrywiaeth
• mae canllaw i reolwyr a gweithwyr ar Wahaniaethu, Bwlio, Aflonyddu, Aflonyddu Rhywiol ac Erledigaeth wedi'i gynhyrchu
• mae gwelliannau wedi'u gwneud i hyfforddiant Cysylltiadau Gweithwyr penodol i reolwyr

Dywedodd llefarydd ar ran Sainsbury’s:

Diogelwch a lles ein cydweithwyr yw ein blaenoriaeth uchaf ac rydym wedi gweithio’n agos gyda’r CCHD i ddatblygu ein hyfforddiant, ein polisïau a’n prosesau ymhellach. Mae gennym bellach fesurau ychwanegol sy'n tanlinellu ein dim goddefgarwch i unrhyw fath o gamdriniaeth neu aflonyddu.