Diogelu staff rhag aflonyddu rhywiol yn National Highways

Rydym wedi ymrwymo i sicrhau bod cyflogwyr yn cael eu dwyn i gyfrif am wahaniaethu, aflonyddu ac erledigaeth fel bod pob gweithiwr yn cael ei drin yn deg.

Mae hyn yn parhau i fod yn flaenoriaeth i ni yn ein Cynllun Strategol 2022 i 2025.

Fe wnaethom ysgrifennu at National Highways ym mis Mawrth 2020 i sicrhau eu bod wedi cymryd y camau angenrheidiol i atal aflonyddu rhywiol rhag digwydd yn y dyfodol.

Buom yn gweithio’n agos gyda National Highways i wneud cytundeb cyfreithiol, a elwir yn gytundeb adran 23 o dan Ddeddf Cydraddoldeb 2006.

Mae’r camau a fabwysiadwyd gan National Highways yn cynnwys mesurau a nodir yn ein canllawiau technegol i gyflogwyr, sy’n cynnig esboniad cyfreithiol ac enghreifftiau ymarferol o sut i fynd i’r afael ag aflonyddu ac ymateb yn effeithiol iddo.

Cytunodd National Highways i weithredu nifer o fesurau allweddol i fynd i’r afael ag aflonyddu rhywiol, gan gynnwys:

• gweithredu Polisi Parch yn y Gweithle newydd
• diweddaru ei fodiwl E-ddysgu ar Gydraddoldeb, Amrywiaeth a Chynhwysiant, a fydd yn orfodol i bob cyflogai
• adnewyddu deunyddiau Recriwtio ac Ymuno i adlewyrchu arfer gorau
• penodi Hyrwyddwyr Cydraddoldeb, Amrywiaeth a Chynhwysiant
• lansio Polisi Adleoli newydd
• hyfforddiant ymarferol mewn cynnal ymchwiliadau a gwrandawiadau disgyblaeth ac achwyn ar gyfer rheolwyr pobl
• adolygu eu proses uwchgyfeirio achosion
• hyfforddiant cyfreithiol i arweinwyr a rheolwyr pobl
• cwblhau asesiadau risg mewn perthynas ag aflonyddu rhywiol a rhoi mesurau lliniaru ar waith i reoli risgiau a nodwyd

Gwnaethom fonitro cydymffurfiad National Highways â'r cynllun gweithredu i sicrhau bod y camau y cytunwyd arnynt yn cael eu cwblhau.