Mae gan y Comisiwn Cydraddoldeb a Hawliau Dynol ddyletswydd i orfodi cyfreithiau cydraddoldeb ac amddiffyn hawliau dynol. Felly, rydym yn ystyried pob honiad o weithgareddau anghyfreithlon yn ofalus ac yn gweithredu lle bo angen.
Wrth ymateb i honiadau a ddangoswyd gan BBC Panorama ar 28 Medi am driniaeth pobl yn Uned Iechyd Meddwl Canolfan Edenfield, yn Prestwich, dywedodd Prif Weithredwr y Comisiwn Cydraddoldeb a Hawliau Dynol, Marcial Boo:
Mae'n bosibl y bydd adroddiadau am weithgarwch anghyfreithlon posibl yn Uned Iechyd Meddwl Canolfan Edenfield yn Prestwich yn dangos torri hawliau dynol cleifion. Mae’r rhain yn cynnwys hawl cleifion i fod yn rhydd rhag triniaeth annynol a diraddiol, eu hawl i ryddid a diogelwch a’u hawl i fywyd preifat a theuluol, gan gynnwys uniondeb corfforol a seicolegol.
Yn anffodus, nid yw'r honiadau yn erbyn Edenfield yn unigryw. Mae cam-drin tebyg wedi cael ei adrodd mewn mannau eraill yn erbyn pobl ag awtistiaeth ac anableddau dysgu. Nid yw cynlluniau gweithredu olynol y llywodraeth wedi arwain at gynnydd digon cyflym i fynd i'r afael â'r pryderon difrifol hyn. Mae angen i hyn newid.
Rydym eisoes yn pwyso ar yr Adran Iechyd a Gofal Cymdeithasol i fynd ymhellach na’r camau yn ei Chynllun Adeiladu’r Cymorth Cywir ar gyfer cleifion a gedwir yn gaeth. Ac rydym wedi nodi’n glir sut y mae’n rhaid i’r defnydd o ataliaeth mewn lleoliadau iechyd ac mewn mannau eraill, gan gynnwys ataliaeth gorfforol ac ynysu, gydymffurfio â chyfraith hawliau dynol yn ein Fframwaith Hawliau Dynol ar gyfer Ataliaeth .
Rydym bellach wedi ysgrifennu at Ymddiriedolaeth Iechyd Meddwl Greater Manchester, wedi anfon copi at y rheoleiddwyr perthnasol, y GIG a'r llywodraeth, i gael sicrwydd y bydd hawliau dynol cleifion yn cael eu hamddiffyn yn weithredol ac ar frys. Byddwn yn ystyried y camau nesaf ar y cyd â rheoleiddwyr iechyd ac yng nghyd-destun ymchwiliadau troseddol parhaus.
Darllenwch ein llythyr at Ymddiriedolaeth Iechyd Meddwl Manceinion Fwyaf yn amlinellu ein pryderon.
