Rhoi gwybod i ni am eich hawliad gwahaniaethu

Pan fyddwch yn cyflwyno hawliad gwahaniaethu yn ymwneud â chydraddoldeb yn y llys sirol (Cymru a Lloegr) neu lys siryf (yr Alban), mae angen i chi anfon gwybodaeth atom am eich hawliad.

Mae rheolau’r llys yn dweud bod yn rhaid i chi roi gwybod i’r Comisiwn Cydraddoldeb a Hawliau Dynol pan fyddwch yn cyflwyno cwyn sy’n ymwneud â chydraddoldeb.

Ar gyfer hawliadau yn y llys sirol (Cymru a Lloegr), nodir hyn ym mharagraff 2 o’r rheolau (a elwir yn Gyfarwyddyd Ymarfer ), o dan adran 114 o Ddeddf Cydraddoldeb 2010.

Ar gyfer hawliadau yn llys y siryf (yr Alban), nodir hyn yn Rheol 44.2 y Rheolau Achosion Cyffredin a Rheol 17.14 y Rheolau Gweithdrefn Syml .

Y diben yw inni weld natur a nifer yr achosion cyfraith gwahaniaethu a ddygir i'r llysoedd. Mae hefyd yn rhoi cyfle i ni ymyrryd mewn achos o dan Adran 30 o Ddeddf Cydraddoldeb 2006.

Gwnawn hyn os yw’r achos yn unol â’n polisi ymgyfreitha a gorfodi a’n bod yn meddwl y gallwn gynorthwyo’r llys drwy ddarparu tystiolaeth arbenigol. Felly, mae gwybodaeth sy’n rhoi digon o fanylion inni ystyried hyn yn ddefnyddiol.

Mae'r wybodaeth a gawn at ddibenion cudd-wybodaeth yn unig ac nid yw'n cael ei chyhoeddi fel mater o drefn. Mae'n cael ei gofnodi a'i storio yn unol â'n polisïau diogelwch a chadw data. I weld sut rydym yn defnyddio eich data personol pan fyddwch yn ei roi i ni, gweler ein hysbysiad preifatrwydd .