Polisi fformatau hygyrch

Rydym yn cynhyrchu ystod eang o wybodaeth ar gyfer unigolion, busnesau, sefydliadau sector cyhoeddus a grwpiau perthnasol eraill.

Mae'r polisi hwn yn nodi ein hymagwedd at ddarparu gwybodaeth mewn fformatau hygyrch fel mesur rhag-weld. Mae hefyd yn egluro sut y byddwn yn ymateb i geisiadau unigol am wybodaeth mewn fformat arall.

Mae gwybodaeth ychwanegol am hygyrchedd ein gwefan ar gael yn ein datganiad hygyrchedd.

Fel corff cyhoeddus, mae gennym rwymedigaeth dan Ddyletswydd Cydraddoldeb y Sector Cyhoeddus i roi 'sylw dyledus' i anghenion pobl anabl. Mae rhoi sylw dyledus yn golygu bod yn gwbl ymwybodol o, a deall, anghenion pobl anabl, a rhoi’r wybodaeth honno ar waith.

Bydd cynhyrchu cyfathrebiadau hygyrch yn cyfrannu at ein nod o hyrwyddo cyfle cyfartal drwy:

• dileu neu leihau'r anfantais y mae pobl â nodweddion gwarchodedig yn ei hwynebu
• cymryd camau i ddiwallu anghenion penodol pobl â nodweddion gwarchodedig
• annog pobl â nodweddion gwarchodedig i gymryd rhan lawn ym mhob gweithgaredd, yn enwedig lle nad ydynt yn cael eu cynrychioli’n ddigonol

Byddwn yn ystyried hygyrchedd pan fyddwn yn cyhoeddi gwybodaeth.

Mae enghreifftiau yn cynnwys:

• ysgrifennu mewn Saesneg clir
• esbonio pynciau cymhleth a thermau cyfreithiol
• defnyddio ffontiau sy'n hawdd eu darllen
• defnyddio ffont maint 14 ar gyfer deunyddiau printiedig a ffont maint 12 ar gyfer deunyddiau ar-lein gyda'r gallu i chwyddo mewn
• dylunio gosodiadau clir
• gwirio cyferbyniadau lliw
• ychwanegu testun amgen at ddelweddau, oni bai eu bod yn addurniadol
• cyhoeddi dogfennau ar ein gwefan yn HTML – lle nad yw hyn yn bosibl, byddwn yn cynhyrchu dogfen PDF neu Word hygyrch
• darparu capsiynau neu drawsgrifiadau gyda fideos

Er bod hwn yn fan cychwyn defnyddiol, rydym yn cydnabod bod angen i ni wneud mwy.

Byddwn yn rhagweithiol wrth ystyried a oes angen fformatau hygyrch i gefnogi pob prosiect a chyhoeddiad.

Byddwn yn ystyried ffactorau fel:

• y gynulleidfa darged, er enghraifft, busnesau, gweision cyhoeddus, gweision sifil, newyddiadurwyr neu unigolion
• effaith rhwystrau cyfathrebu, er enghraifft, gallu rhywun i gymryd rhan mewn cyfarfodydd neu ymgynghoriadau
• os yw’r gweithgaredd yn rhesymol, yn gymesur ac yn cynrychioli gwerth da am arian y trethdalwyr

Byddwn yn defnyddio data i lywio ein penderfyniadau. Er enghraifft, byddwn yn edrych ar y defnydd o fformatau hygyrch ar gyfer prosiectau a chyhoeddiadau tebyg.

Lle bynnag y bo modd, byddwn yn ceisio cyhoeddi fformatau safonol a hygyrch ar yr un pryd ac ar yr un dudalen we. Efallai y bydd adegau pan nad yw hyn yn ymarferol. Er enghraifft, os oes angen i ni gyhoeddi gwybodaeth frys neu os oes oedi yn ystod y broses gynhyrchu. Yn yr achosion hyn, byddwn yn cyhoeddi fformatau hygyrch cyn gynted â phosibl.

Byddwn yn hyrwyddo argaeledd fformatau hygyrch er mwyn annog mwy o bobl i fanteisio arnynt.

Mae enghreifftiau yn cynnwys:

• cyhoeddi fformatau safonol a hygyrch gyda'i gilydd
• hyrwyddo argaeledd fformatau hygyrch, er enghraifft, mewn areithiau, cyflwyniadau a negeseuon cyfryngau cymdeithasol
• gofyn i sefydliadau allanol raeadru gwybodaeth i'w haelodau a'u cynulleidfaoedd

Gwiriwch nad yw'r wybodaeth sydd ei hangen arnoch eisoes ar y wefan cyn cyflwyno ceisiadau am fformatau hygyrch.

Os nad yw'r wybodaeth sydd ei hangen arnoch ar gael, ewch i'n tudalen we cysylltu â ni ar gyfer ymholiadau cyffredinol. Rhowch gymaint o fanylion â phosibl am yr wybodaeth sydd ei hangen arnoch a'r fformat sydd ei angen arnoch. Byddwn yn gofyn cwestiynau pellach os nad yw'r cais yn ddigon clir.

Byddwn yn edrych ar bob cais ac yn ystyried ffactorau fel:

• y gynulleidfa darged, er enghraifft, busnesau, gweision cyhoeddus, gweision sifil, newyddiadurwyr neu unigolion
• effaith rhwystrau cyfathrebu, er enghraifft, gallu rhywun i gymryd rhan mewn cyfarfod neu ymgynghoriad
• os yw’r cais yn rhesymol, yn gymesur ac yn cynrychioli gwerth da am arian y trethdalwyr

Rydym yn debygol o wrthod ceisiadau nad ydynt yn bodloni'r meini prawf hyn. Byddwn yn esbonio ein penderfyniadau a, lle bo modd, yn ceisio cynnig dewisiadau eraill.

Ni allwn deilwra fformatau hygyrch presennol ar gyfer unigolion. Er enghraifft, os yw unigolyn yn gofyn i ni newid PDF hygyrch i gynnwys lliwiau penodol neu i ddileu rhai o'r tudalennau.

Byddwn yn adolygu’r polisi hwn bob 12 mis. Bydd y fersiwn diweddaraf yn ymddangos ar ein gwefan ac yn disodli fersiynau blaenorol. Rydym yn cadw'r hawl i dynnu'n ôl neu newid y polisi hwn ar unrhyw adeg.

Byddwn yn monitro'r defnydd o fformatau hygyrch, er enghraifft, faint o bobl sy'n edrych ar fformatau hygyrch ar ein gwefan. Byddwn yn cofnodi pob cais am fformatau hygyrch a'n penderfyniadau. Byddwn yn defnyddio'r data hwn i nodi meysydd i'w gwella ac i ddiweddaru'r polisi hwn.