Y rheoleiddiwr cydraddoldeb yn ymgysylltu â Llywodraeth yr Alban a GIG Fife ynghylch mynediad staff i gyfleusterau un rhyw

Mae’r Comisiwn Cydraddoldeb a Hawliau Dynol wedi ysgrifennu heddiw at Ysgrifennydd y Cabinet dros Iechyd a Gofal Cymdeithasol a GIG Fife, ynghylch mynediad at gyfleusterau newid un rhyw ar gyfer staff y GIG.

Dywedodd y Farwnes Kishwer Falkner, Cadeirydd y Comisiwn Cydraddoldeb a Hawliau Dynol:

“Fel rheoleiddiwr cydraddoldeb Prydain, rydym yn hyrwyddo ac yn gorfodi cydymffurfiaeth â Deddf Cydraddoldeb 2010.

“Rhaid i gyrff iechyd yn yr Alban, Lloegr a Chymru feddu ar ddealltwriaeth gywir o weithrediad y Ddeddf Cydraddoldeb fel y mae’n ymwneud â darparu gwasanaethau a mannau un rhyw.

“Heddiw fe wnaethom atgoffa GIG Fife o’u rhwymedigaeth i amddiffyn unigolion rhag gwahaniaethu ac aflonyddu ar sail nodweddion gwarchodedig, gan gynnwys rhyw, crefydd neu gred ac ailbennu rhywedd.

“O dan Ddyletswydd Cydraddoldeb y Sector Cyhoeddus, rhaid i bob bwrdd iechyd yn yr Alban asesu sut mae eu polisïau a’u harferion yn effeithio ar bobl â nodweddion gwarchodedig. Rydym wedi gofyn i GIG Fife roi copi inni o unrhyw asesiad o'r effaith ar gydraddoldeb sy'n ymwneud â darparu cyfleusterau newid i staff; unrhyw wybodaeth sy'n berthnasol i'r modd y mae polisïau o'r fath wedi cael eu hadolygu; ac unrhyw fanylion am y camau a gymerwyd i sicrhau bod hawliau grwpiau gwahanol yn gytbwys wrth weithredu'r polisïau hyn.

“Fe wnaethom hefyd dynnu sylw at y ffaith bod Rheoliadau Gweithle (Iechyd, Diogelwch a Lles) 1992 yn datgan na fydd cyfleusterau newid yn addas “oni bai eu bod yn cynnwys cyfleusterau ar wahân ar gyfer dynion a merched, neu ddefnydd ar wahân o gyfleusterau gan ddynion a merched lle bo angen am resymau priodoldeb”. Mae gan yr Awdurdod Gweithredol Iechyd a Diogelwch God Ymarfer Cymeradwy a chanllawiau y gall Byrddau'r GIG gyfeirio atynt.

“Yr wythnos hon adroddodd y cyfryngau ar Ganllaw Pontio GIG yr Alban sydd ar ddod, y cadarnhaodd Llywodraeth yr Alban ei fod wedi’i rannu â byrddau iechyd wrth baratoi ar gyfer ei weithredu. Mae’n bwysig bod y canllaw hwn, a’r holl ganllawiau, polisïau ac arferion sy’n dibynnu arno, yn adlewyrchu ac yn cydymffurfio’n ffyddlon â Deddf Cydraddoldeb 2010.

“Rydym wedi gofyn am gael cyfarfod ag Ysgrifennydd y Cabinet i drafod rôl Llywodraeth yr Alban o ran sicrhau bod GIG yr Alban a chyrff eraill yn bodloni eu rhwymedigaethau cyfreithiol o dan y Ddeddf Cydraddoldeb.”