Rheoleiddiwr yn rhoi cyngor i gyflogwyr ar y menopos a’r Ddeddf Cydraddoldeb

Heddiw, cyhoeddwyd canllawiau newydd ar y menopos yn y gweithle, sy’n nodi rhwymedigaethau cyfreithiol cyflogwyr o dan Ddeddf Cydraddoldeb 2010, gan y Comisiwn Cydraddoldeb a Hawliau Dynol (EHRC).

Mae llawer o fenywod yn adrodd eu bod wedi profi effeithiau negyddol symptomau’r menopos yn y gweithle, gyda rhai hyd yn oed yn teimlo eu bod yn cael eu gorfodi i adael eu swyddi o ganlyniad.

Mae ymchwil yn dangos bod un o bob deg o fenywod a holwyd sydd wedi gweithio yn ystod y menopos wedi gadael eu swyddi oherwydd symptomau, tra bod dwy ran o dair o fenywod sy’n gweithio rhwng 40 a 60 oed sydd â phrofiad o symptomau’r menopos wedi dweud eu bod wedi cael effaith negyddol ar y cyfan yn y gwaith. Fodd bynnag, ychydig iawn o weithwyr sy'n gofyn am addasiadau i'r gweithle yn ystod y cyfnod hwn, gan ddyfynnu pryderon yn aml am adweithiau posibl.

Wrth i nifer y menywod sy’n profi menopos tra mewn cyflogaeth gynyddu, mae’n hanfodol bod cyflogwyr yn gwybod sut i gefnogi gweithwyr sy’n profi symptomau menopos. Nid yn unig y mae hyn yn sicrhau eu bod yn cyflawni eu cyfrifoldebau cyfreithiol, ond hefyd bod menywod yn y grŵp hwn yn gallu parhau i gyfrannu at y gweithle ac elwa ar waith.

Nod y canllawiau newydd gan yr EHRC yw egluro’r rhwymedigaethau cyfreithiol hyn a rhoi awgrymiadau ymarferol i gyflogwyr ar wneud addasiadau rhesymol a meithrin sgyrsiau cadarnhaol am y menopos gyda’u gweithwyr.

Os yw symptomau’r menopos yn cael effaith hirdymor a sylweddol ar allu menyw i gyflawni gweithgareddau arferol o ddydd i ddydd, efallai y byddant yn cael eu hystyried yn anabledd. O dan Ddeddf Cydraddoldeb 2010, bydd cyflogwr dan rwymedigaeth gyfreithiol i wneud addasiadau rhesymol ac i beidio â gwahaniaethu yn erbyn y gweithiwr.

Yn ogystal, gall gweithwyr sy'n profi symptomau menopos gael eu hamddiffyn rhag triniaeth lai ffafriol sy'n gysylltiedig â'u symptomau menopos ar sail oedran a rhyw.

Anogir cyflogwyr i ystyried yn ofalus y canllawiau sydd bellach ar gael o wefan y Comisiwn ac addasu eu polisïau a’u harferion yn unol â hynny, er mwyn sicrhau tegwch a chynhwysiant yn y gweithle.

Nodiadau i Olygyddion

• Mae 'Canllawiau ar y Ddeddf Cydraddoldeb a'r menopos' y Comisiwn Cydraddoldeb a Hawliau Dynol ar gael ar wefan y Comisiwn Cydraddoldeb a Hawliau Dynol.
• Mae’r Comisiwn Cydraddoldeb a Hawliau Dynol hefyd yn cefnogi achos honedig o wahaniaethu ar sail menopos, sy’n aros am ddyfarniad gan y tribiwnlys cyflogaeth yng Nghaerlŷr ar hyn o bryd.
• Canfu ymchwil ar 'Menopause and the Workplace', a gyhoeddwyd yn 2022 gan y Fawcett Society, fod un o bob deg o fenywod a holwyd a oedd yn gweithio yn ystod y menopos wedi gadael eu swyddi oherwydd symptomau.
• Canfu ymchwil ar ‘Menopos yn y Gweithle’, a gyhoeddwyd ym mis Hydref 2023 gan y Sefydliad Siartredig Personél a Datblygu, fod dwy ran o dair o fenywod sy’n gweithio rhwng 40 a 60 oed sydd â phrofiad o symptomau’r menopos wedi dweud eu bod wedi cael effaith negyddol ar y cyfan arnynt yn y gwaith.
• Canfu canlyniadau arolwg o Menopos a’r gweithle, a gyhoeddwyd ym mis Chwefror 2022 gan Bwyllgor Menywod a Chydraddoldebau Tŷ’r Cyffredin, mai dim ond 12 y cant o’r ymatebwyr a ofynnodd am unrhyw addasiadau i’r gweithle, tra bod dros chwarter na ofynnodd am unrhyw addasiadau wedi dweud mai'r rheswm oedd 'Roeddwn i'n poeni am yr ymateb.'