McDonald's yn arwyddo cytundeb cyfreithiol gyda'r CCHD i amddiffyn staff rhag aflonyddu rhywiol

Mae McDonald’s Restaurants Limited wedi arwyddo cytundeb cyfreithiol gyda’r Comisiwn Cydraddoldeb a Hawliau Dynol (CCHD) mewn ymateb i bryderon am y modd yr ymdriniwyd â chwynion aflonyddu rhywiol a wneir gan staff yn ei fwytai yn y DU.

O dan y cytundeb cyfreithiol gyda’r CCHD (a elwir yn gytundeb adran 23 o dan Ddeddf Cydraddoldeb 2006), mae McDonald’s Restaurants Limited wedi ymrwymo i'r canlynol:

• cyfathrebu agwedd dim goddefgarwch tuag at aflonyddu rhywiol
• cynnal arolwg dienw o weithwyr am ddiogelwch yn y gweithle
• gwella polisïau a gweithdrefnau i atal aflonyddu rhywiol a gwella ymatebion i gwynion
• darparu hyfforddiant gwrth-aflonyddu i weithwyr
• cyflwyno hyfforddiant a deunyddiau penodol i helpu rheolwyr i nodi meysydd risg yn eu bwytai a chymryd camau i atal aflonyddu rhywiol
• cefnogi’r defnydd o bolisïau a deunyddiau hyfforddi gan ddeiliaid masnachfraint o fewn eu sefydliadau annibynnol i gefnogi adrodd am aflonyddu rhywiol
• monitro cynnydd tuag at amgylchedd gwaith diogel, parchus a chynhwysol

O dan Ddeddf Cydraddoldeb 2010, mae cyflogwyr yn gyfreithiol gyfrifol os yw cyflogai yn cael ei aflonyddu’n rhywiol yn y gwaith gan weithiwr arall, ac nid yw’r cyflogwr wedi cymryd pob cam posibl i’w atal rhag digwydd.

Dywedodd y Farwnes Falkner, Cadeirydd y Comisiwn Cydraddoldeb a Hawliau Dynol:

“Ni ddylai fod unrhyw oddefgarwch tuag at aflonyddu rhywiol mewn unrhyw sefydliad. Gall ddinistrio bywydau pobl a chreu amgylchedd gwaith gwenwynig i bawb.

"Mae pob cyflogwr, ni waeth pa mor fawr neu fach, yn gyfrifol am amddiffyn ei weithlu. Rydym yn gweithio gyda phob cwmni i'w helpu i wneud hyn. Rydym yn benderfynol o fynd i'r afael â diwylliannau aflonyddu rhywiol yn y gweithle, boed mewn bwytai neu westai, clybiau chwaraeon. neu swyddfeydd.

“Rydym yn falch bod McDonald's wedi arwyddo'r cytundeb hwn i nodi eu bwriad i wneud eu bwytai yn lleoedd diogel i weithio ynddynt. Gall y gwelliannau y maent yn eu rhoi ar waith osod esiampl i eraill ei dilyn, boed yn y diwydiant lletygarwch neu rywle arall.”

Dywedodd Alistair Macrow, Prif Weithredwr, McDonald's Restaurants Limited yn y DU ac Iwerddon:

“Fel un o brif gyflogwyr y DU, diogelwch a lles ein pobl yw ein blaenoriaeth lwyr. Mae’n hynod bwysig i mi fod pawb yn ein sefydliad yn teimlo’n ddiogel, yn cael eu parchu a’u cynnwys bob amser – mae hyn yn greiddiol i werthoedd ein busnes.

“Mae gennym ni hanes cryf yn y maes hwn yn barod ac rydw i nawr yn croesawu’r cyfle i weithio gyda’r CCHD i gryfhau hyn ymhellach. Byddwn yn partneru â’r CCHD i gryfhau ein dulliau hyfforddi ac adrodd arfer gorau ar draws ein busnes i sicrhau bod ein gwerthoedd yn cael eu deall, eu byw a’u gweithredu ar draws ein sefydliad. Nid oes lle i aflonyddu a chamdriniaeth yn ein cymdeithas nac yn McDonald’s.”

Yn y Mesur Diogelu Gweithwyr, mae’r Senedd ar hyn o bryd yn ystyried gosod dyletswydd ar gyflogwyr i gymryd pob cam rhesymol i atal aflonyddu rhywiol.

Mae rhai cyflogwyr yn dweud bod nifer isel o adrodd yn ôl yn golygu nad oes problem gydag aflonyddu yn eu gweithle, neu’n cymryd yn ganiataol bod polisïau a gweithdrefnau’n ddigon i atal aflonyddu rhag digwydd. Gall gwneud y rhagdybiaethau hyn a pheidio â gweithredu fod yn hynod niweidiol i ddioddefwyr.

Mae'r CCHD, fel rheoleiddiwr cydraddoldeb Prydain, yn annog pob cyflogwr i gymryd camau gweithredol i atal aflonyddu rhywiol yn y gweithle. Gallant dynnu ar ganllawiau’r CCHD, sy’n cynnwys esboniad cyfreithiol ac enghreifftiau ymarferol o sut i atal ac ymateb yn effeithiol i aflonyddu. Mae'r CCHD hefyd wedi gweithio gydag UK Hospitality i gynhyrchu rhestr wirio a chynllun gweithredu i helpu bwytai, gwestai a thafarndai i amddiffyn eu gweithwyr.

Nodiadau i Olygyddion

• Mae rhagor o wybodaeth am sut rydym yn defnyddio Cytundebau Adran 23 ar gael i’w darllen ar ein gwefan. Mae enghreifftiau o gytundebau blaenorol yn cynnwys Network Rail, Jaguar Land Rover a Sainsbury's.
• Rydym yn sefydliad chwythu’r chwiban rhagnodedig, felly os oes gan gyflogai wybodaeth bod ei gyflogwr yn torri cyfraith cydraddoldeb gallant adrodd eu pryderon i ni.
• Os credwch y gallech fod wedi cael eich trin yn annheg ac eisiau cyngor pellach, gallwch gysylltu â'r Gwasanaeth Cynghori a Chymorth Cydraddoldeb.