Mae myfyriwr cynorthwyol labordy wedi derbyn setliad ariannol gan ei gyn gyflogwr, Micropathology Ltd, yn dilyn honiadau o wahaniaethu ar sail hil a chrefydd.
Fe wnaeth Micropathology Ltd, sydd wedi’i leoli yn Coventry, ddiswyddo Waqas Rai, 23, heb rybudd ar 31 Rhagfyr 2021. Mae’r Comisiwn Cydraddoldeb a Hawliau Dynol wedi cefnogi ei achos.
Fisoedd ar ôl iddo gael ei ddiswyddo, rhoddodd cyn-reolwr Mr Rai ddarlith prifysgol a gafodd ei recordio a'i huwchlwytho ar-lein. Yn y recordiad, roedd y rheolwr i'w glywed yn trafod yn agored y rhesymau dros ddiswyddo Mr Rai ac yn dweud ei fod yn meddwl ei fod wedi cael ei 'radicaleiddio'.
Mewn gohebiaeth ddiweddarach â'r brifysgol, cymharodd y rheolwr Mr Rai yn benodol â'r 'dyn a laddodd yr AS yn Southend', gan ddweud bod ei ymddygiad 'deallus iawn' ond 'hollol oddefol' yn arwydd ei fod wedi'i radicaleiddio. Lladdwyd Syr David Amess AS yn 2021 gan Ali Harbi Ali, a gafwyd yn euog o lofruddiaeth a pharatoi gweithredoedd terfysgol.
Aethpwyd â hawliad gwahaniaethu Mr Rai yn erbyn ei gyn gyflogwr i dribiwnlys cyflogaeth, ond fe setlodd y partïon cyn gwrandawiad terfynol. Nid yw’r setliad yn cynnwys cyfaddefiad atebolrwydd ar ran Micropathology Ltd, ond maent wedi cyhoeddi datganiad cyhoeddus ynghylch yr achos ac wedi ymrwymo i gynnal hyfforddiant cydraddoldeb ac amrywiaeth.
Darparodd y Comisiwn Cydraddoldeb a Hawliau Dynol arian a chymorth gyda'r achos fel rhan o'i gynllun cymorth cyfreithiol ar gyfer achosion gwahaniaethu ar sail hil .
Dywedodd y Farwnes Kishwer Falkner, Cadeirydd y Comisiwn Cydraddoldeb a Hawliau Dynol:
Mae’r modd y diswyddwyd Waqas, a’r sylwadau a wnaed wedi hynny amdano mewn ymgais i’w gyfiawnhau, yn gwbl annerbyniol. Mae gan bawb yr hawl i fynd i'r gwaith heb boeni eu bod yn mynd i gael eu trin yn wahanol oherwydd eu hil neu grefydd.
“Y tro hwn rhannwyd y sylwadau’n gyhoeddus, ond does dim ots a gawsant eu gwneud mewn neuadd ddarlithio, labordy, swyddfa neu hyd yn oed mewn e-bost – ni ddylid goddef gwahaniaethu yn unman.
“Fel corff gwarchod cydraddoldeb Prydain, byddwn yn parhau i ddefnyddio ein pwerau unigryw i gynnal y gyfraith ac atal gwahaniaethu yn y gweithle.
Dywedodd Waqas Rai:
Ni allwn ei gredu pan glywais yr hyn a ddywedwyd amdanaf yn y recordiad am y tro cyntaf. Roeddwn i'n teimlo mor grac a dryslyd.
"Mae wedi effeithio'n fawr ar fy iechyd meddwl ac wedi gwneud i mi deimlo'n bryderus am barhau i weithio yn y diwydiant. Bob tro rwy'n ymuno â sefydliad newydd neu'n dechrau swydd newydd, rwy'n teimlo fy mod bob amser yn mynd i fod yn baranoiaidd am yr hyn y mae pobl yn ei feddwl. Rwy'n poeni na allaf fod yn fi fy hun oherwydd yr hyn y gallai pobl fod yn ei feddwl amdanaf.
"Rwy'n gobeithio y gall rhannu fy mhrofiad helpu i'w atal rhag digwydd i eraill yn y dyfodol, ond i unrhyw un sydd wedi cael ei drin fel fi, rydw i eisiau dweud bod help ar gael. Hoffwn ddiolch i fy nghyfreithiwr a'r Comisiwn Cydraddoldeb a Hawliau Dynol am eu cefnogaeth.
Cynrychiolwyd yr hawlydd gan Asif Timol o Fairmont Legal, gyda chefnogaeth gan yr Uned Ymateb Islamoffobia.
Dywedodd Asif Timol:
Mae'r achos hwn wedi cael effaith sylweddol ar fy nghleient, ond rwy'n gobeithio y bydd y setliad yn helpu i wella'r difrod a achoswyd.
