Corff gwarchod cydraddoldeb yn cyflwyno ymateb i ymgynghoriad ar gau swyddfeydd tocynnau rheilffordd

Dywedodd y Farwnes Kishwer Falkner, Cadeirydd y Comisiwn Cydraddoldeb a Hawliau Dynol:

“Rydym wedi cyflwyno ymateb i ymgynghoriad yr Adran Drafnidiaeth (DfT) ar y bwriad i gau swyddfeydd tocynnau ar draws y rhwydwaith rheilffyrdd.

“Rydym yn croesawu’r estyniad i’r cyfnod ymgynghori, a ddeilliodd yn rhannol o’n llythyr a anfonwyd at yr Adran ym mis Gorffennaf. Ond rydym yn parhau i bryderu am effaith bosibl cau swyddfeydd tocynnau, yn enwedig ar ddefnyddwyr rheilffordd anabl a hŷn.

“Mae ein hymateb yn atgoffa cwmnïau trenau a’r Adran o’u rhwymedigaethau cyfreithiol o dan Ddyletswydd Cydraddoldeb y Sector Cyhoeddus Deddf Cydraddoldeb 2010. Mae hyn yn ei gwneud yn ofynnol i’r rhai sy’n darparu gwasanaethau cyhoeddus, megis teithio ar drenau, feddwl sut mae eu penderfyniadau a’u polisïau yn effeithio ar bobl sy’n gyfreithiol wedi eu hamddiffyn, megis pobl ag anableddau, fel nad ydynt dan anfantais.

“Rydym yn arbennig o siomedig nad yw’r Adran Drafnidiaeth wedi dangos i ni na chyhoeddi asesiad effaith cydraddoldeb ar eu cynigion eto.

“Rydym yn annog cwmnïau trenau i weithredu ar yr adborth a gawsant, er mwyn lleihau unrhyw effaith andwyol ar eu cynigion, yn enwedig ar bobl anabl a phobl hŷn.”