Corff gwarchod cydraddoldeb: mae angen i'r llywodraeth wneud mwy i atal aflonyddu yn y gweithle

Mae’r Bil Diogelu Gweithwyr (Diwygiad Deddf Cydraddoldeb 2010), sy’n cael ei drafod yn y Senedd ar hyn o bryd, yn gyfle gwerthfawr i gryfhau’r mesurau diogelu presennol yn erbyn aflonyddu yn y gweithle.

Mae bron i dri chwarter (72%) o'r boblogaeth oedolion wedi profi aflonyddu rhywiol ar ryw adeg yn ystod eu hoes. Er gwaethaf amddiffyniadau presennol, mae'n amlwg bod aflonyddu rhywiol yn y gweithle yn parhau i fod yn gyffredin, yn aml yn mynd heb ei adrodd, ac yn cael sylw annigonol gan gyflogwyr.

Mae hyn yn rhoi’r baich ar unigolion, a allai gael eu trawmateiddio gan eu profiad, i fynd ar drywydd hawliad tribiwnlys er mwyn cael iawn.

Rydym yn croesawu cyflwyniad y Bil o ddyletswydd ragweithiol ar gyflogwyr i frwydro yn erbyn aflonyddu rhywiol yn y gweithle drwy gymryd camau i’w atal rhag digwydd yn y lle cyntaf.

Mae hwn yn newid pwysig.

Fodd bynnag, rydym yn pryderu am ddileu amddiffyniadau arfaethedig yn y Bil rhag aflonyddu gan drydydd partïon, megis cwsmeriaid, cleientiaid a chleifion.

Datgelodd ein hadroddiad Turning the Tables fod aflonyddu trydydd parti yn broblem benodol i fenywod sy’n gweithio mewn rolau sy’n wynebu cwsmeriaid, gyda thua chwarter yr achosion o aflonyddu wedi’u hadrodd yn ymwneud â chyflawnwyr a oedd yn drydydd partïon.

Nododd ein hadroddiad hefyd fod aflonyddu rhywiol gan drydydd partïon yn aml yn cael ei gamdrafod, gyda rhai cyflogwyr yn meddwl y dylid ei dderbyn fel agwedd 'normal' o'r swydd.

Mae arolwg barn diweddar yn awgrymu bod dwy o bob pump o ferched ifanc wedi cael eu haflonyddu gan gwsmer neu gleient. Mae cyfraith achosion hefyd wedi dangos nad yw darpariaethau aflonyddu presennol yn darparu amddiffyniad digonol yn erbyn aflonyddu trydydd parti.

Rydym yn annog y llywodraeth i fynd i'r afael â'r bwlch hwn mewn amddiffyniad a rhoi'r eglurder angenrheidiol i gyflogwyr i sicrhau bod eu gweithwyr yn cael eu hamddiffyn rhag aflonyddu gan gwsmeriaid, cleientiaid a chleifion.