Menopos yn y gweithle: Canllawiau i gyflogwyr

Gwyliwch y fideos esboniadol

Mae'r adnoddau hyn wedi'u cynllunio i helpu cyflogwyr i ddeall eu rhwymedigaethau cyfreithiol mewn perthynas â chefnogi gweithwyr sy'n profi symptomau'r menopos.

Menopos yw pan fydd mislif menyw yn dod i ben oherwydd lefelau hormonau is.1 Mae fel arfer yn digwydd rhwng 45 a 55 oed ond gall ddigwydd yn gynharach neu'n hwyrach. Gall ddigwydd am nifer o resymau, gan gynnwys:

• yn naturiol
• geneteg
• llawdriniaeth
• triniaethau canser

Weithiau mae’r rheswm yn anhysbys.

Perimenopos yw pan fydd gan fenyw symptomau menopos, ond nid yw misglwyf wedi dod i ben.

Gall y menopos achosi ystod o symptomau corfforol a seicolegol. Gallwch ddod o hyd i ragor o wybodaeth am yr ystod o symptomau yma.

Gall symptomau menopos gael effaith sylweddol ar fenywod yn y gwaith.

Canfu ymchwil gan y Sefydliad Siartredig Personél a Datblygu fod dwy ran o dair (67%) o fenywod sy’n gweithio rhwng 40 a 60 oed sydd â phrofiad o symptomau’r menopos yn dweud eu bod wedi cael effaith negyddol yn bennaf arnynt yn y gwaith.

O’r rhai yr effeithiwyd arnynt yn negyddol yn y gwaith:

• dywedodd 79% eu bod yn llai abl i ganolbwyntio
• dywedodd 68% eu bod yn profi mwy o straen
• dywedodd bron i hanner (49%) eu bod yn teimlo'n llai amyneddgar gyda chleientiaid a chydweithwyr, a
• theimlai 46% yn llai abl yn gorfforol i gyflawni tasgau gwaith.

O ganlyniad i hyn, roedd dros hanner yr ymatebwyr yn gallu meddwl am adeg pan nad oeddent yn gallu mynd i’r gwaith oherwydd symptomau eu menopos.

Canfu ymchwil pellach gan Gymdeithas Fawcett fod un o bob deg o fenywod a holwyd a oedd yn gyflogedig yn ystod y menopos wedi gadael y gwaith oherwydd symptomau’r menopos.

O dan Ddeddf Cydraddoldeb 2010, caiff gweithwyr eu hamddiffyn rhag gwahaniaethu, aflonyddu ac erledigaeth ar sail nodweddion gwarchodedig gan gynnwys anabledd, oedran a rhyw.

Os yw symptomau’r menopos yn cael effaith hirdymor a sylweddol ar allu menyw i gyflawni gweithgareddau arferol o ddydd i ddydd, gellid ystyried y symptomau hyn yn anabledd. Os yw symptomau’r menopos yn gyfystyr ag anabledd, bydd rhwymedigaeth gyfreithiol ar gyflogwr i wneud addasiadau rhesymol. Byddant hefyd o dan rwymedigaeth gyfreithiol i beidio â gwahaniaethu'n uniongyrchol neu'n anuniongyrchol oherwydd yr anabledd na gwneud y fenyw yn destun gwahaniaethu sy'n deillio o anabledd.

Gall menywod sy’n profi symptomau menopos hefyd gael eu hamddiffyn rhag gwahaniaethu uniongyrchol ac anuniongyrchol, yn ogystal ag aflonyddu ac erledigaeth, ar sail oedran a rhyw.

O dan ddeddfwriaeth iechyd a diogelwch, mae gan gyflogwyr rwymedigaeth gyfreithiol hefyd i gynnal asesiad o risgiau eu gweithle.

Gwyliwch y fideos hyn i gael gwybod am:

• eich rhwymedigaethau cyfreithiol fel cyflogwr
• awgrymiadau da ar gyfer cefnogi gweithwyr sy'n profi menopos

Mae'r fideo hwn yn gyflwyniad i'r menopos yn y gweithle. Mae’n manylu ar sut y gall gweithwyr sy’n profi symptomau menopos gael eu diogelu gan Ddeddf Cydraddoldeb 2010, ac yn amlinellu’r rhwymedigaethau cyfreithiol sydd gan gyflogwyr o dan y Ddeddf.

Mae’r fideo hwn yn rhoi enghreifftiau o addasiadau ymarferol yn y gweithle a newidiadau y gall cyflogwyr eu gwneud i gefnogi eu gweithwyr ac atal gwahaniaethu. Mae'n egluro'r risgiau sy'n gysylltiedig â methu â gwneud addasiadau o'r fath ac yn amlinellu manteision cymryd camau rhagweithiol.

Mae'r fideo hwn yn rhoi arweiniad ar gael sgyrsiau am y menopos. Mae'n esbonio dulliau allweddol y gall cyflogwyr annog diwylliant lle mae gweithwyr yn teimlo y gallant siarad am eu symptomau a gofyn am addasiadau i'w gwaith. Mae’n esbonio sut y gall cyflogwyr gynnwys pob gweithiwr mewn sgyrsiau am y menopos, a manteision gwneud hynny.

Roedd y sefydliadau canlynol yn rhan o'n grŵp cyfeirio. Roedd eu cyfraniad yn cefnogi datblygiad yr adnoddau hyn. 

• Sefydliad Siartredig Personél a Datblygu
• Sefydliad Rheolaeth Siartredig
• Ffederasiwn Busnesau Bach
• Henpicked: Menopos yn y Gweithle
• The Fawcett Society
• Elusen Menopos
• Lles Merched
• Llywodraeth Cymru