Cyhoeddi gwybodaeth cydraddoldeb: canllawiau i ysgolion

Dylai ysgolion gyhoeddi gwybodaeth (data) sy’n dangos sut y maent wedi bodloni Dyletswydd Cydraddoldeb y Sector Cyhoeddus (PSED) bob blwyddyn erbyn 30 Mawrth. Bydd cyhoeddi data, tystiolaeth a gwybodaeth sy’n ymwneud â chydraddoldeb nad ydynt yn gyfrinachol am ysgol a’i disgyblion yn helpu llywodraethwyr, ymddiriedolwyr academi a rhieni i ddeall pam mae’r ysgol yn gwneud penderfyniadau penodol.

Pa wybodaeth ddylai ysgolion ei chasglu?

Gall y wybodaeth hon gynnwys:

• data perfformiad yr ysgol
• polisïau gwrth-fwlio
• cynllun datblygu ysgol a cherrig milltir cydraddoldeb
• deunyddiau cwricwlwm
• cofnodion corff llywodraethu
• deunyddiau hyfforddi cydraddoldeb
• arolygon rhieni a disgyblion.

Nid yw'r PSED yn ei gwneud yn ofynnol i ysgolion gasglu mwy o wybodaeth fel mater o drefn nag y maent eisoes. Yn y rhan fwyaf o achosion, bydd gan ysgolion ddigon o wybodaeth eisoes, naill ai yn y data y maent yn ei gasglu fel mater o drefn, trwy broffilio unigol neu yn y cofnodion y mae athrawon dosbarth yn eu cadw.

Lle mae bylchau, gall ysgolion benderfynu eu llenwi drwy gael barn rhieni a disgyblion â nodweddion gwarchodedig penodol . Dylai arweinydd yr ysgol benderfynu a oes gan yr ysgol ddigon o wybodaeth am ddisgyblion â nodweddion gwarchodedig gwahanol i’w galluogi i fodloni’r PSED.

Mewn cyfarfodydd llywodraethwyr neu ymddiriedolwyr, pan fydd polisïau newydd yn cael eu cymeradwyo, mae’n syniad da cofnodi trafodaethau am faterion cydraddoldeb sy’n codi, gan ddangos pa dystiolaeth a ddefnyddiwyd. Bydd hyn yn helpu i’w gwneud yn glir sut y cyflawnwyd y PSED.

Disgwylir i ysgolion sydd â 150 neu fwy o staff gyhoeddi gwybodaeth i ddangos sut y maent wedi bodloni’r ddyletswydd cydraddoldeb mewn perthynas â staff yn ogystal â data sy’n ymwneud â disgyblion.

Fe welwch ragor o wybodaeth am gyflogaeth yn ein canllaw hanfodol i'r PSED.

Mae ein canllawiau technegol ar y PSED yn Lloegr a phennod 5 o ganllawiau’r Adran Addysg ar Ddeddf Cydraddoldeb 2010 yn cynnwys rhagor o wybodaeth a llawer o awgrymiadau defnyddiol ac ymarferol ynghylch yr hyn y gall ysgolion ei gyhoeddi.

I gael rhagor o wybodaeth am ataliaeth, darllenwch yr adroddiad o’n hymchwiliad Atal Mewn Ysgolion: defnyddio data ystyrlon i amddiffyn hawliau plant a naw astudiaeth achos o arfer dda ar gyfer ysgolion .