Ymateb EHRC i adroddiad 'Hospital is not home'

“Rydym yn bryderus iawn ynglŷn â chanfyddiadau adroddiad newydd Comisiwn Lles Meddwl yr Alban, ‘Hospital is not home’, sy’n rhoi mewnwelediad mawr ei angen i brofiadau pobl sydd wedi’u cadw yn yr ysbyty ers dros 10 mlynedd.

“Mae cydymffurfiaeth briodol â’r fframwaith cyfreithiol cydraddoldeb yn hollbwysig ym mhob lleoliad iechyd a gofal cymdeithasol, er mwyn sicrhau bod pobl yn cael y cymorth sydd ei angen arnynt i wneud penderfyniadau am eu gofal a byw’n annibynnol.

“Mae’r defnydd o drefniadau ‘anffurfiol’, a nodir yn yr adroddiad hwn, yn hytrach na gweithdrefnau a ragnodir o dan Ddeddfwriaeth Iechyd Meddwl neu Analluogrwydd, yn peri pryder arbennig. Amlygwyd hyn yn y camau cyfreithiol a gymerwyd gennym yn 2020 yn erbyn GIG Greater Glasgow a Clyde am hwyluso cadw’n anghyfreithlon.

“Mae canfyddiadau’r Comisiwn Lles Meddwl bod niferoedd uchel o gleifion heb eu cofnodi yn ‘byw’ mewn ysbytai ers dros 10 mlynedd, ac mewn rhai achosion hyd at 25 mlynedd, yn codi cwestiynau ynghylch a yw’r cyrff cyhoeddus dan sylw yn methu â chyflawni eu rhwymedigaethau o dan Ddyletswydd Cydraddoldeb y Sector Cyhoeddus.

“Fel rheoleiddiwr cydraddoldeb Prydain, rydym hefyd yn bryderus ynghylch yr ymdrechion cyfyngedig a wnaed i ddarparu cymorth eiriolaeth arbenigol i bobl mewn ysbytai am gyfnodau estynedig yn yr Alban, gan fod hyn yn awgrymu y gallai’r cyrff cyhoeddus dan sylw fod yn methu â gweithredu yn y modd ‘rhagweladwy’ sy’n ofynnol i fodloni dyletswydd addasiadau rhesymol y Ddeddf Cydraddoldeb.

“Mae’n amlwg o’r canfyddiadau hyn nad yw Strategaeth ‘Coming Home’ Llywodraeth yr Alban eto wedi llwyddo yn ei nod o sicrhau mai dim ond cyhyd ag y bydd angen triniaeth y mae pobl yn yr ysbyty.

“Rydym yn annog Llywodraeth yr Alban a’r holl asiantaethau iechyd a gofal cymdeithasol i roi sylw manwl i’r canfyddiadau hyn a chymryd camau brys i sicrhau cydymffurfiaeth briodol â gofynion cyfreithiol cydraddoldeb.”