Canllaw newydd yn galw ar fanwerthwyr i wneud mwy i helpu cwsmeriaid anabl

Wrth ymateb i’r pryderon cynyddol dros hygyrchedd archfarchnadoedd a manweithwyr, rydym wedi cyhoeddi canllaw newydd, i helpu’r diwydiant gynorthwyo cwsmeriaid anabl yn well yn ystod y pandemig.

Anfonwyd y canllaw i Brif Weithredwyr archfarchnadoedd a chonsortia manwerthu ochr yn ochr â llythyr gan ein Prif Weithredwr, Rebecca Hilsenrath, yn nodi’u rhwymedigaethau cyfreithiol i helpu cwsmeriaid anabl.

Eglura’r llythyr sut ddylai manwerthwyr ragweld anghenion cwsmeriaid anabl a gwneud addasiadau rhesymol fel y gallant siopa ar-lein neu yn y siopau yn hyderus – yn arbennig am fwyd ac eitemau hanfodol.

Mae’r canllaw newydd yn cynnwys pedwar cam:

• Darparu gwasanaeth sydd yn diwallu anghenion pob cwsmer – rhagweld, paratoi a gwneud addasiadau rhesymol ar gyfer cwsmeriaid anabl.
• Cynllunio o flaen llaw am anghenion eich cwsmeriaid anabl – ystyried a gwneud newidiadau i bolisïau a gweithdrefnau, yn ogystal â darparu cymorth ac offer ychwanegol, pan fo angen.
• Cyfathrebu â’ch cwsmeriaid – hysbysu cwsmeriaid am sut y byddant yn cael eu cefnogi drwy amryw ffyrdd megis arwyddion hawdd eu darllen a chyhoeddiadau llafar.
• Hyfforddi’ch staff – sicrhau bod staff yn cael eu cefnogi gan yr offer cywir i helpu cwsmeriaid anabl, yn unol â chanllaw diweddaraf y llywodraeth ar goronafeirws (COVID-19).

Meddai Rebecca Hilsenrath, Prif Weithredwr y Comisiwn Cydraddoldeb a Hawliau Dynol:

Mae siopa wedi newid i bawb yn ystod y pandemig. Rydym wedi darllen am storïau anghyffredin am yr ymdrechion a wnaed gan fanwerthwyr a grwpiau gwirfoddol i ddarparu help lle’r oedd ei angen. Fodd bynnag, daeth tasg a oedd eisoes â heriau a rhwystrau i bobl anabl yn amhosibl o’r bron i rai.

Rydym wedi clywed am ystod o bryderon, o giwiau hir heb fannau gorffwys, i ddiffyg ymwybyddiaeth am gyflyrau iechyd penodol sydd yn golygu nad oes rhaid i bobl wisgo masg wyneb o’r herwydd.

Mae Coronafeirws wedi datgelu rhai o anghydraddoldebau gwaethaf ein cymdeithas ac mae pobl anabl yn wynebu caledwch neilltuol.

Waeth pa benderfyniadau a chamau a wneir, mae gan bob manwerthwr ddyletswydd gyfreithiol i weithredu yn ôl y gyfraith. Mae’n hanfodol na chaiff pobl anabl eu gadael ar ôl wrth i fanwerthwyr barhau i ateb heriau’r pandemig parhaus.